ფილმი ზღაპარი “ჯარა” ერთწლიანი მოგზაურობაა აჭარის ველურ ბუნებაში.  
   ტყეში ჩამოკიდებული ჯარადან ფუტკრების დანახული ბუნების მშვენიერება და უმოწყალობა; ადამიანები, მათი ჩარევა, მათთან მშვიდობიანი თანაარსებობა და კონფლიქტი. ცხოვრება ერთმანეთის სასარგებლოდ და საზიანოდ, ფუტკრის შრომა, მტაცებლების შიში. მენახირეები, დათვები, ადგილობრივი მეფუტკრეების ცხოვრება და სოფლის დღეები. ამბები სოფლებიდან, სადაც ძნელია გაიგო სად გადის ზღვარი ადამიანების საცხოვრებელ გარემოსა და ველურ ბუნებას შორის.  
   ფილმი მოგიყვებათ გადარჩენისა და კეთილდღეობისთვის ადამიანებისა თუ ცხოველების ყოველდღიური ბრძოლის შესახებ. სიზმარი აჭარის შესახებ – მარტივი ასახდენია, თქვენ მხოლოდ ჯარას გზას უნდა მიჰყვეთ, ნახოთ სად ცოცხლობს უძველესი ტრადიცია, სად იშლება ჩვენს წარმოდგენებში არსებული საზღვრები.  

     გაზაფხულსა და შემოდგომაზე მილიონობით ფრინველი გადაუფრენს აჭარის სანაპიროს. მასთანაა შერწყმული არაერთი ტრადიცია და ადათ-წესი. მაგალითად, ბაზიერობის ტრადიცია. ყოველ წელს ამ მოვლენაზე დასაკვირვებლად აქ მეტი და მეტი ტურისტი ჩამოდის და აკეთებს აღმოჩენას, რომ ეს ე.წ. “ბერდვოჩერებისთვის” – ფრინველებზე დამკვირვებელი ტურისტებისთვის ნამდვილი სამოთხეა.
აქ 360-მდე სახეობის ფრინველის ნახვა შეიძლება, მათგან 3 ენდემურია, სხვაგან მათი ნახვა შეუძლებელია. 20-მდე სახეობა კი გლობალურად საფრთხის ქვეშ მყოფი და იშვიათია, თუმცა აჭარაში მათი ბუნებაში ნახვა ჯერ კიდევ ადვილია. ფრინველებზე დამკვირვებელ მოყვარულ ტურისტებს კავკასიაში ყველაზე მეტად კავკასიური როჭო იზიდავს.

კავკასიის ბიომრავალფეროვნება – 34 “ცხელი წერტილიდან” ერთ-ერთი

   ბიომრავალფეროვნების მნიშვნელობისა და მისი განადგურების საფრთხის მიხედვით, დღეს მსოფლიოში ბიომრავალფეროვნების 34 „ცხელ წერტილს“ გამოყოფენ. ეს იმას ნიშნავს, რომ ეს “წერტილები” ბიოლოგიურად განსაკუთრებით მდიდარია, მაგრამ ამავე დროს განსაკუთრებით დიდი საფრთხის წინაშე დგას. საქართველოს ტერიტორია სწორედ ასეთ ცხელ წერტილებში შედის. კერძოდ, კავკასიის (საქართველოს უმეტესი ნაწილი) და ირან-ანატოლის (სამხრეთ საქართველო) რეგიონები.
როგორც ზოგადად მსოფლიოში, ასევე საქართველოშიც ბიომრავალფეროვნების ძირითადი საფრთხეები სახეობების საცხოვრებელი გარემოს შემცირება, გაუარესებაა. ამის მთავარი მიზეზი კი ძირითადად, ტყეების განადგურებაა, ასევე ბიოლოგიური რესურსების ჭარბი ან არალეგალური მოპოვება – ნადირობა, თევზჭერა, ტყის კაფვა, ანდა გარემოს დაბინძურება.

მეტი